about knitzeknilch

...auf dem Weg zur Arche

zur Übersicht Schwäbische Volkslieder

Dr schwäbische Noah

1. Dr Herrgott sait em Ärger: "Mir wird des langsam z'domm! Do hoscht dr Menscha gschaffa, ond der streitet sich bloß rom! Dui Krone dera Schepfung kennt nix als Mord ond Krach. Dui Kugelfuhr hairt uff mir, dia laß i na dr Bach! Mit Ausnohm von dem Noah, des isch zwar au a Glob, doch halt a reachter Schaffer, den brauch e no als Schwob. Drom bleibt'r", denkt dr Herrgott, "en maira Gnade schtau." So schtoht des en dr Bibel, ond also schtemmt des ao!

2. Dr Herrgott sait zom Noah: "Jetzt wird no älles naß, ond älle Leit vrsaufet, em Haus ond uff dr Gass. Doch du sollscht ned vrkomma, di bhalt e fescht em Griff! Hol deine grauße Buaba ond bau aus Holz a Schiff!" Dr Noah moint er ka net, dr Herr sait: "Komm, fang a! Ond ed lang 'Guda Morga', sonscht bischd a dauder Ma! Du wirsch no viel erkenna, mai liaber wart's no ab! Jetzt mach a bissle nore, breng deine Leit en Trab.

3. Dr Noah schreit: "Mai Herrgott, i sieh dai Sintflut komma." Dr Herr sait: "Schnell jetzt älles no glei am Bendel gnomma! Nemm von jedem Viech a Bärle, ohne Mäggele ond gsond, ond vrgiß mr ned dai Weible, daine Kender, Katz ond Hond. Dr Noah folgt saim Herrgott, er nemmt, was er vrdwischt. So kommed Viech ond Menscha halt zema nai end Kischd. Ond wia se ebavool isch, da schtoht er no ond schnauft, ond sieht drbei durchs Guckloch wie älles rengs vrsauft.

4. Dui Arche schwemmt ond schauklet dort uff dem graußa Meer. Se kommt noch vierzig Dägla ganz schief ond schräg drher. Dr Noah schreit: "O Herrgott, du brengsch oin recht en Schuß! Sag mir doch bloß, wo bene?" "Du bischd em Kaukasus! Dui Flut laß I vrdlaufa, no bisch du wieder frei. No ziasch ens Schwobalendle ond bauscht a Haisle glei. I laß main Hemml offa, daß i äls zu eich sieh. Send fleißig, brav ond fruchtbar, ond denged ao an mi!"